ناوەندی ڕاگەیاندن و چاپەمەنی هێزەکانی سوریای دیموکراتیک (قەسەدە) بە ڕاگەیاندراوێکی نووسراو ڕایگەیاند دوێنێ چەتەکانی دەوڵەتی تورک هەوڵیاندا دزە بکەنە نێو گوندێکی کانتۆنی فورات، لە ئەنجامدا ٥ چەتە کوژران و ٤ چەتە برینداربوون.

لە ڕاگەیاندراوەکەدا گوتراوە: "دوێنێ شەو چەتەکانی دەوڵەتی داگیرکەری تورک هەوڵیاندا دزە بکەنە نێو گوندی عەبدۆک لە ڕۆژئاوای گرێ‌سپی داگیرکراو. بەڵام هۆشیاری و وریایی شەڕڤانەکانمان وای کرد، هەرزوو پلانەکانی هێرشەکە و دزەکردنەکەیان ئاشکرا بکەن و شکستی پێ بهێنن. هێزەکانمان توانیان چەتەکان بخەنە نێو بۆسەوە، لە ئەنجامدا شەڕ ڕوویدا، ٥ چەتە کوژران و ٤ چەتە برینداربوون. بۆ ماوەیەک شەڕەکە درێژەی کێشا و دواتر چەتەکان هەڵاتن.

بۆ هەڵگرتنەوەی تەرمەکانیان لە دەوروبەری گوندی عەبدۆک،چەتەکان و دەوڵەتی داگیرکەری تورک تا درەنگانی دوێنێ شەو بە چەکی قورس هێرشیان کرد و زیاتر لە ١٥٠ گولـلە تۆپ و هاوەنیان بەرەو گوندەکە هاویشت. لە ئەنجامدا زیانی ماددی بە ماڵ و موڵکی هاوڵاتیان گەیشت.

دەوڵەتی داگیرکەری تورک و چەتەکانی بە فڕۆکەی بێ فڕۆکەوان و چەکی قورس باکوور و ڕۆژهەڵاتی سوریا دەکەنە ئامانج، تاوەکو ترس و دڵەڕاوکێ لەنێو دانیشتووان بڵاوبکەنەوە و ناچاریان بکەن بە ئاوارەبوون".