تەرمی فەرماندەی یەکینەکانی پاراستنی ژن (یەپەژە) زۆزان حەسەکە (منەوەر فاتمە) کە ٢ ی نیسان شەهید بوو، لە گۆڕستانی شەهید دژوار لە حەسەکە بە مەراسیمێکی شکۆدار بەخاکسپێردرا.

سەدان دانیشتووی کانتۆنی جەزیرە و ناوچە و شارەکان، نوێنەرانی ئیدارەی خۆبەڕێوەبەری دیموکراتیک، پیاوماقووڵ و ئەندامانی ڕێکخراوەکانی ژنان بەشداربوون.

جەماوەر تەرمی شەهید زۆزانیان لەبەردەم ناوەندی مەجلیسی بنەماڵەی شەهیدان وەرگرت و بە کاروانی ئۆتۆمبیل بەرەو گۆڕستانی شەهید دژوار لە گوندی داودیە بەڕێکەوتن.

لە گۆڕستان پاش مەراسیمێکی سەربازی لەلایەن یەپەژەوە، ئەندامی مەجلیسی بنەماڵەی شەهیدانی حەسەکە، فاتمە عەلی گوتی: "شەهید زۆزان ساڵی ١٩٩٠ دەستی بە تێکۆشان کرد و ٣٤ دژی ستەم و زۆداری تێکۆشا، تاوەکو ژنان بگەن بەم ئاستە".

فاتمە بەڵێنیدا بە مەزنکردنی تێکۆشان تا مسۆگەرکردنی ئازادی جەستەیی ڕێبەری گەلی کورد عەبدوڵا ئۆجالان و ڕزگارکردنی خاکە داگیرکراوەکان و دامەزراندنی جڤاکێکی دیموکراتیک و ئازاد.

ئەندامی فەرماندەیی گشتی یەپەژە ڕۆهیڵات عەفرین سەرەخۆشی لە بنەماڵەی شەهید کرد و ڕایگەیاند شەهید زۆزان بۆ پاراستنی دەسکەوتەکانی هەرێمەکە لە هەڵمەتەکانی کۆبانێ و دەیرەزۆر و سەرێکانی ڕیزەکانی پێشەوەی گرت، گوتی: "بنەماڵەی فاتیمە دەمێکە بۆ ئازادی کوردستان تێدەکۆشن و دەیان شەهیدیان کردۆتە فیدای ئەم ڕێگەیە".

ئەندامی کۆنگرەی ستار لالەشین حەسەکە گوتی: "حەسەکە شایەتحاڵی تێکۆشانی شەهید زۆزانە بۆ ڕزگارکردنی ژنانو پاراستنی دەسکەوتەکانی ڕۆژئاوا".

پاشان ناسنامەی شەهید زۆزان خوێنرایەوە و ڕادەستی بنەماڵەکەی کرا، دواتر تەرمی شەهید بەخاکسپێردرا.