تەرمی شەڕڤانی هێزەکانی ڕزگاری عەفرین (هەرەئە) وڵات قەرەجداخ (سەیدخان تەمەل) کە ٢٣ ی تشرینی یەکەم لە قۆناغی دووەمی بەرخۆدانی سەردەم شەهید بوو، بە مەراسیمێک بەخاک سپێردرا.

سەدان دانیشتووی شارەکانی دێرک، چلاغا و گەرکی لەگی لە بەردەم نەخۆشخانەی نیشتمانی لە شاری دێرک، تەرمی شەهید وڵاتیان وەرگرت و بە کاروانێکی ئۆتۆمبیلەوە بەرەو گۆڕستانی شەهید خەبات دێرک بەڕێ کەوتن.

کاتێک کاروانی تەرمەکە گەیشتە گۆڕستانەکە، بە دروشمی "شەهید نامرن" و "بە گیان و خوێن لەگەڵتیان ئەی شەهید" پێشوازی لێکرا.

لە گۆڕستانەکە، دوای خولەکێک ڕێزگرتن، ئەندامی مەجلیسی بنەماڵەی شەهیدانی گەرکی لەگی ئیحسان شیبلی قسەی کرد و وتی: "ئەستەمە بە چەند وشەیەک باس لە گەورەیی شەهیدان بکەین، چونکە شەهیدان مێژووی هەبوون و ناسنامە و ئازادی ئێمەن. ئامانجیان ئازادی گەلانە. شەهیدان پردێکن بۆ گەیاندنمان بە ئازادی".

لە فەرماندەکانی قەسەدە خالد عەلی گوتی: "شەهید وڵات بە باوەڕبوونی بە فەلسەفەی ڕێبەر عەبدوڵا ئۆجالان ڕوویکردە ڕۆژئاوای کوردستان و بەرامبەر هێرشەکانی دەوڵەتی داگیرکەری تورک بۆ سەر باکوور و ڕۆژهەڵاتی سوریا شوێنی خۆی لەنێو هەرەئەدا گرت و تا کۆتایی تێکۆشا".

سەرۆکی ڕابیتەی ئالوبەیتی هەرێمی باکوور و ڕۆژهەڵاتی سوریا سینان سەیدوش بێدەنگی هێز و ڕێکخراوە نێونەتەوەییەکانی بەرامبەر هێرشەکانی دوڵەتی داگیرکەری تورک ڕەخنەکرد و گوتی: "پێویستە لەسەر هێڵی شەهیدان بەردەوام بین و دەسکەوتەکان بپارێزین. پێویستە بۆ ڕزگاری وڵاتەکەمان فیداکار بین".

پاشان ناسنامەی شەهید خوێنرایەوە و ڕادەستی بنەماڵەکەی کرا، تەرمی شەهید بە درووشمی "شەهید نامرن" و هەلهەلە بەخاک سپێردرا.