ناوەندی ڕاگەیاندنی هێزەکانی مەجلیسی سەربازیی مەنبەج ئاماری هێرشەکانی ٢٤ کاتژمێری ڕابردووی بە ڕاگەیاندراوێک بڵاوکردەوە.

لە ڕاگەیاندراوەکەدا ئاماژە بەوە کراوە دەوڵەتی داگیرکەری تورک بەردەوامە لەسەر بەئامانجگرتنی ژێرخانی خزمەتگوزاری و گوند و شارەکان.

هەروەها دەڵێت: "دەوڵەتی تورک بە فڕۆکەی جەنگی و فڕۆکەی بێ فڕۆکەوان هێرشی کردە سەر هەرێمەکە و لە ئەنجامدا دەیان کەس شەهید و بریندار بوون. تا ئێستە ١٣ گوندی باکوور، ڕۆژئاوا و باکووری ڕۆژهەڵاتی شارەکە ٨ جار بە مووشەک تۆپباران کراون، ٤ جار بە فڕۆکەی بێ فڕۆکەوان، ٣ جار بە فڕۆکەی خۆکوژ بۆردوومانکراون.

لە تۆپبارانی گوندی ئەلبونیەی ڕۆژهەڵاتی مەنبەج خانووی هاوڵاتییەک بە تەواوی وێران بووە، مناڵێک بە ناوی فەرەح ئەلبەرحۆ (١١ ساڵ) شەهید بووە، عەبدولرەحمان بەرحۆ (١٣ ساڵ) و سەمیر بەرحۆ (٨ ساڵ) بریندار بوون.

هێزەکانمان ٢ درۆنی خۆکوژی سوپای داگیرکەری تورکیان خستووەتەخوارەوە".