کەمال بولبول: بۊنەو دماکەوتەیۊ تراژیدیاێوە گەورە قۊمیا
پەرلەمانتاروو هەدەپەی "کەمال بولبول" ئەرەیاوناش، بۊنەو ئانەیۊ وەختوو وێشەنە و زوو نەلۍ دەمشاوە، چێروو بینا وڕیایەکانە تراژیدیاێوە گەورە قۊمیا.
پەرلەمانتاروو هەدەپەی "کەمال بولبول" سەبارەت بە بوومەلەرزەکەی، قسێش پەی ئاژانسوو هەواڵوو فوراتی (ANF) کەردۍ و ئانەش وست ڕووە، جە "سەمسور"نە، کە یۊن جە یاگەکا کە کورڎساننە فرەتەرین زەرەرش وەر کەوتەن، خەڵک هەست پانەیە کەرا کەس وێش بە ساعیبشا مەزانۊ، سەرنجەش کێشتە پەی ئانەی کە بەهەزارا جەنازۍ چێروو یانە وڕیایەکانە هەنۍ، دامودەزگاکاو دۊڵەتی نە بە ماددی و نە بە مەعنەوی هامکارییشا مەکەرا.
بولبول، باسش جە دۊخوو سەمسوری کەردە و واتش: "سەمسورنە بە هەزارا یانۍ وڕێنۍ. بەداخۊ وەختوو وێشنە نەلۍ دەمشاوە و بی بایسوو ئانەی کارەساتۍ گەورە و تراژیدیایۍ خەمئاوەر قۊمیا. تا ئیسەیچ ماچا چێروو یانە وڕیایەکانە دەنگوو خەڵكی مژنەویۊ، بەڵام چێولای ئیتر ئەسەما. ئێمە ملمۍ ئا یاگا و هەوڵۍ مدەیمۍ تیمۍ جیاجیۍ بەرمۍ ڕاوە. جە ئەوەڵۊ تا ئیساتۍ "ئافاد" و "شارەوانی" و حیچ دەزگاێوە دۊڵەتی بە ماددی و بە مەعنەوی حیچ هامکاریێوەشا نەیاونان.
'خەڵک وێشا هەست بە پارێزیای مەکەرا '
بولبول ئانەیچش وست ڕووە، کە سەقف و پایەو یانە وڕیایەکا ورمەگێریۊوە و ژمارێوە فرەو خەڵکی بۊنەو دێرفریاکەوتەیۊ مەردێنۍ و واتش، "گلێرگە هەست بە نەپارێزیای وێش کەرۊ. جە ڕووەو تەندروسییوە حیچ خزمەتگوزاریێوە نییا. ئارۊ سەرێم دا نەوەشخانەو "سەمسور"ی و دکتۊرەکاو ئاگەی پەنەشا واتا، کە بەشێوە فرە جە قوربانییەکاو بوومەلەرزەکەی دەسوپاشا جەدەس دان، بە شێوێوە تەمامەتی و رێکوپێک هامکاری نەیاوان شارەکەی و ئیتر دەگێکێچ با چا مردا. پێسە هەدەپەی چەنی رێکوزیا دیموکراتیکەکا چا کووۍ بییەیمێوە، ناوەندێوە ڕاوەبەردەیما ساز کەرد و مێزەو قەیرانیما وەش کەردە".
'وەڵێوینای پەی چەنەکەوتەیۊکا بوومەلەرزەکەی کەرێنمۍ'
بولبول ئەرەیاوناش، ئا وەختە بوومەلەرزەکە کەوت، ئاد "مێردین"نە بییەن و بۊنەو لەرەو بوومەلەرزەکەیۊ وەڵێوینایشا پەی چەنەکەوتەیۊکاو بوومەلەرزەکەی کەرڎەن و واتیچش، "کەسوکارما جە "سەمسور" و "مەرەش"نە واتشا: 'ڕاسا بوومەلەرزە کەوتەن و زەرەریچش دان'. ئێمە دەمودەس وێما یاونا سەمسور.
بولبول واتش، کە مێزەو قەیرانوو "هەدەپە"ی و "ڕێکوزیایە دیموکراتیکەکا" سازە کریۊ و جە دمایی قسەکاشنە واتش، "هیزی شارەوانیی "جنار"ی ئاما و جە جەمخانەو یەنی مەحەلەی چاشتخانێوەش وەش کەرد. پەی هەوەڵجاری شەوەی ویەرڎۍ وارڎەی گەرمما وارد. پێسە گەلوو کورڎی بیینمۍ شایەتوو فرەتەرین تراژیدیایا و کۊکوشیی گەورەی، وەلێم ئی تراژیدیا گەورەتەرا".
هـ . ب
