لە سالی ٢٠٠٨ بەم لاوە هەرساڵ بە بۆنەی ٤ی نیسان ساڵڕۆژی لەداییک بوونی ڕێبەری گەلی کورد عەبدوڵا ئۆجالان، لە وارگەی پەنابەرانی شەهید رۆستەم جوودی ( مەخموور) ئەم فستیڤالە بەڕێوە دەچێت.

ئەمڕۆ، لە کامپی پەنابەرانی شەهید ڕۆستەم جودی-مەخمور، بە پێشەنگایەتیی کۆمیتەی کلتور و وەرزشی کامپەکە، ١٣ـمین فێستیڤاڵی ٤ی نیسان دەستیپێکرد.

لە سەرەتای فێستیڤاڵەکەدا دوای خولەکێک وەستان بۆ ڕێزگرتن لە شەهیدانی ئازادیی، لەسەر ناوی کۆمیتەی کلتور و وەرزش، زەینەب کارا وتارێکی پێشکەش کرد و باسی لەوە کرد، کە نزیکەی مانگێکە لەگەڵ خوێندکارەکان ئامادەکاریی بۆ ئەو فێسیتیڤاڵە دەکەن.

وتیشی: بەو کار و چالاکییانەی لە فێستیڤاڵەکەدا پێشکەشی دەکەین، ساڵڕۆژی لەدایکبوونی ڕێبەر ئۆجالان پیرۆز دەکەین و دەمانەوێت، کە ئیدی ڕێبەر ئۆجالان بە شێوەیەکی فیزیکیی لەناو ئێمەدا بێت و ئەم ڕۆژە بەیەکەوە پیرۆز بکەین.

پاشان پێشانگایەکی شێوەکاریی کرایەوە، کە بڕیارە هەتا ٤ی نیسان بەردەوام بێت، لە پێشانگاکەدا چەندین وێنە و تابلۆ نامیش کراون، کە لەلایەن ئەندامانی کاری دەستیی شەهید دەلیلا و خوێندکارانەوە کێشراون.

لەبارەی پێشانگاکەوە، ڕووناهی تۆک ئەندامی کاری دەستیی شەهید دەلیلا وەتی، کە ئەوان ساڵانە لە ٤ی نیساندا بەشداریی فێستیڤاڵەکە دەکەن و پێشانگاکانیان بەشێوەیەکی باش لەلایەن دانیشتوانی کامپەکەوە پێشوازیی لێدەکرێت.

فێستیڤاڵەکە ماوەی سێ ڕۆژ بەردەوام دەبێت، بڕیارە سبەینێ پێشبڕکێی وەرزشیی لەنێوان خوێندکاراندا بەڕێوەبچێت، ڕۆژی ٤ی نیسان-یش، لە ناوەندی کلتور و هونەری مەخمور، بە ئاهەنگ و گۆرانیی ساڵیادی لەدایکبوونی ڕیبەر ئۆجالان پیرۆز بکرێت و فێستیڤاڵەکە کۆتایی بێت.

ک-ش