بەگوێرەی ڕوانگەی سوری بۆ مافەکانی مرۆڤ (سۆهر)، چەتەکانی داعش لە هەرێمی حومس هێرشیان کردۆتە سەر ٣ بنکەی سەربازی حکومەتی دیمەشق و هێزەکانی سەر بەو حکومەتە.

ڕاگەیاندراوە، لە هێرشەکاندا لانی کەم ١٧ سەربازی حکومەتی دیمەشق کوژراون، حکومەتی دیمەشقیش هیچ ڕاگەیاندراوێکی بڵاونەکردۆتەوە.

هێرشە گەورەکەی چەتەکانی داعش لە سوریا لە ١٩ ی نیسان پێکهات، لە دوو هێرشەدا لە ناوچەکانی حکومەت بەتایبەت لە شاری حومس، ٢٨ سەربازی حکومەتی شام و ملیشیاکانی لایەنگری حکومەت کوژران. بەگوێرەی سۆهر زۆربەی کوژراوەکان سەر بە گرووپێکی چەکداری فەڵەستینین بە ناوی سەرایا ئەلقدس.

بەگوێرەی سۆهر، لە سەرەتای ئەمساڵەوە لە هێرش و بۆسە و تەقینەوەکانی داعش، بەتایبەت لە هەرێمی دەیرەزۆر و حومس و ڕەقە، لانی کەم ٢٩٩ سەربازی دیمەشق و هێزە لایەنگرەکانی کوژراون.