مەجلیسی گەلانی دیموکراتیکی ئیدارەی خۆبەڕێوەبەریی دیموکراتیکی هەرێمی باکوور و ڕۆژهەڵاتی سوریا، ئەمڕۆ (٢ ی کانوونی یەکەم) دەربارەی دوایین پێشهاتەکانی لە سوریا و کاریگەرییەکانی لەسەر هەرێمی باکوور و ڕۆژهەڵاتی سوریا کۆبوونەوەیەکی نائاسایی ئەنجامدا.

بەگوێرەی ئەو زانیارییانەی لەسەر ماڵپەڕی ئیدارەی خۆبەڕێوەبەری بڵاوکراوەتەوە، لە کۆبوونەوەکەدا هەڵسەنگاندن بۆ پێشهاتەکانی هەرێمەکە کراوە و شێوازی پێکهێنانی سەفەربەریی گشتی ئیدارەی خۆبەڕێوەبەری تاوتوێ کراوە.

ئەو بڕیارانەی دراون

لە ئەنجامی هەڵسەنگاندنەکان ئەم بڕیارانە دران:

_ پێویستە لە سەفەربەری گشتییدا، پشتگیری لە هێزەکانی سوریای دیموکراتیک (قەسەدە) بکرێت.

_ بۆ شرۆڤەکردنی پێشهاتە سیاسییەکان و تیشک خستنەسەر شەڕی تایبەت دژی هەرێمی باکوور و ڕۆژهەڵاتی سوریا، پێویستە کۆبوونەوەی جەماوەریی ئەنجام بدرێت.

_ پێویستە بۆ ئەگەری هێرشکردنە سەر هەرێمی باکوور و ڕۆژهەڵاتی سوریا، ئامادەکاری بکرێت.

_ پێویستە لە هەموو شار و شارۆچکە و کانتۆنەکان، کۆمیتەی باری لەناکاو دابمەزرێت.

_ لە هەموو شار و شارۆچکە و کانتۆنەکان کۆمیتەکانی پاراستنی هێزەکانی پاراستنی جەوهەری (هەپەجە) بەهێزبکرێن و پشتگیریان لێ بکرێت.

_ لە دەروازە سنوورییەکان کۆمیتەکانی باری لەناکاو چالاک بکرێن بۆ پێشوازیکردن لە پەنابەرانی ناوچەکانی دیکەی سوریا.