دانیشتوانی گەڕەکی شێخ مەقسوود و ئەشرەفیەی شاری حەڵەب بە مەراسیمێکی جەماوەری تەرمی شەڕڤانی یەپەگە عەگید عەفرین (کەمال ئەحمەد) کە لە ٢٩ی تشرینی دووەم لەکاتی جێبەجێکردنی ئەرکی پاراستنی گەڕەکەکانی شێخ مەقسوود و ئەشرەفییە شەهید بوو بە خاک سپارد.

بەشداربووانی مەراسیمەکە بە شەقامە سەرەکییەکانی گەڕەکی شێخ مەقسوددا ڕێپێوانیان کرد و دروشمی "شەهید نامرێ"یان بەرزکردەوە.

سەرەتای مەراسیمەکە بە خولەکێک ڕێزگرتن بۆ یادی شەهیدانی ئازادی دەستی پێکرد، دواتر ئەندامی ئەنجومەنی بنەماڵەی شەهیدان فەخری حەنان قسەی کرد و وتی: "لە هەر شوێنێک هێزمان بێت ئەو شوێنە ئەمنیەتی هەیە، چونکە ئەوان دەمانپارێزن و گیانیان فیدای گەلەکەیان دەکەن."

ئەمینە بایرەم بەناوی بنەماڵەی شەهیدەوە وتی: "کەس ناتوانێت لەناومان ببات، چونکە ئێمە خاوەن ئیرادە و هێزین وبەسایەی ئەوانەوە دەپارێزرین."

پاشان ناسنامەی شەهید عەگید عەفرین خوێندرایەوە و ڕادەستی بنەماڵەکەی کرا.

تەرمی شەهید بە دروشم و تلیلی دایکان بەخاک سپێردرا.