نوری مەحمود وتەبێژی یەکینەکانی پاراستنی گەل (یەپەگە) لەبارەی ئەو کۆمەڵکوژییەی دەوڵەتی تورکی داگیرکەر لە گەڕەکی هلێلیی شاری قامیشلو ئەنجامیدا، کە بەهۆیەوە کەسایەتیی نیشتمانپەروەر و تێکۆشەری یوسف گولۆ و دوو منداڵی شەهید بوون، راگەیاندراوێکی بڵاوکردەوە:

"جارێکیتر دەوڵەتی تورکی داگیرکەر بە بەر چاوی جیهانەوە نیشانیدایەوە، کە لە هەموو شوێنێک گەلی کورد دەکاتە ئامانج و پاکتاوی دەکات.

هێرشی دڕندانەی دوێنێ (09.11.2021) بۆ سەر قامیشلۆ ئەوە نیشان دەدات، کە مەبەستی دەوڵەتی تورکی تۆرانی پاکتاوکردن و کۆمەڵکوژکردنی کوردان و هاووڵاتییانە بە بێ جیاوازی، تەنها لەبەر ئەوەی کوردن، کۆمەڵکوژیان دەکات.

لە ئەنجامی ئەو هێرشە دڕندانەیەدا کەسایەتیی کۆمەڵایەتی یوسف گولۆ و نەوەکانی مەزڵوم گولۆ و محەمەد گولۆ، کە لەگەڵیدا بوون شەهید بوون.

ئێمە تیرۆری تورکیا شەرمەزار دەکەین و سەرەخۆشی لە گەل و بنەماڵەی گولۆ دەکەین. هەروەها بە جیهانیشی رادەگەیەنین،  کۆمەڵکوژییەکانی دەوڵەتی تورک ناتوانێت کارمان تێ بکات و ناتوانێت ئێمە لەسەر ڕێگای شەهیدان و تێکۆشانی ڕزگاری و ڕزگاری لە نیری تیرۆری دڕندانە دووربخاتەوە.

شەهید یوسف گولۆ کەسایەتییەکی کۆمەڵایەتی و ریشسپییەکی کۆمەڵگەی کورد بوو، کە بە مەعریفە و هەڵوێستە نیشتمانپەروەرییەکانی  ناوبانگی هەبوو. لە تەمەنی گەنجییەوە بەشداریی خەبات و تێکۆشانی ئاشتییانە و دیموکراتیانە بوو تاوەکو خزمەت بە دۆزی گەلەکەی  بکات. پشتیوانی لە هەموو شۆڕش و ڕاپەڕینەکانی کورد دەکرد. کاتێک بزووتنەوەی ئازادیی کوردستان دەستی پێکرد، یوسف گولۆ بە هەموو توانایەوە پشتگیریی لێکرد و دەرگای بەڕووی شۆڕشگێڕانی کوردستاندا کردەوە و لە ڕووی مادی و مەعنەوییەوە پشتیوانییان بوو. نامەردیی بەرامبەر شۆڕشی بزووتنەوەی ئازادیی کوردستان نەکرد و بە دڵ پشتگیریی لێکرد. هەروەها هانی منداڵەکانی دا، کە بەشداری لە ڕیزی شۆڕشگێڕاندا بکەن و بە درێژایی شۆڕشی کوردستان، منداڵەکان و نەوەکانی چوونە ناو ریزەکانی شۆڕشی کوردستان و لەو پێناوەدا شەهید بوون.

لە ڕۆژئاوا و لە سەرەتای شۆڕشی ١٩ی تەمووزەوە شەهید یوسف گولۆ لەگەڵ هەموو خێزان و منداڵ و نەوەکانی پشتیوانییان لەم  شۆڕشە کرد، منداڵەکان و نەوەکانی هان دا بۆ ئەوەی بچنە ڕیزی شۆڕش و ئەوانیش چالاکانە بەشدارییان لە ڕیزی هێزەکانماندا کرد و  چەندین کەسیان چوونە کاروانی شەهیدانەوە و ئێستاش دەیان منداڵ و نەوە و برا و خزمی لەناو ریزەکانماندان.

شەهید گولۆ تێکۆشەرێکی ڕاستەقینەی ئازادیی گەل و وڵاتەکەی بوو و ڕۆڵی گەورەی لە بنیاتنانی خۆشەویستی و بناغەی ژیانی هاوبەش لە نێوان پێکهاتەکانی باکوور و ڕۆژهەڵاتی سوریادا هەبوو.

ئێمە دووبارە ئەو هێرشە ترسنۆکانەیە ئیدانە دەکەین و دڵنیاین، کە هێزەکانمان پابەند و وفادار دەبن بە ئامانجەکانی شەهیدان و بەردەوام دەبن لە تێکۆشانیان بۆ بەدەستهێنانی سەرکەوتن و تێکشکاندنی داگیرکاریی تورک. هەروەها بە دڵنیاییەوە جەخت لەوە دەکەینەوە، کە ئەو هێرشە ترسنۆکانەیە بێ وەڵام نابێت".

ژ.ت