هاوسەرۆکایەتیی کۆنسەی بەڕێوەبەریی کەجەکە بەبۆنەی ٤ ی نیشان ساڵڕۆژی لەدایکبوونی ڕێبەر ئاپۆوە، ڕاگەیاندراوێکی بڵاوکردەوە. کەجەکە دووپاتی کردەوە، دەبێت لەمەودواش بە ئامانجی ئازادیی جەستەیی ڕێبەر ئاپۆ و بەدیهێنانی هەلومەرجی ژیان و کارکردنی ئازادی ڕێبەر ئاپۆ، تێکۆشان بکرێت.

درێژەی ڕاگەیاندراوەکەی کەجەکە بەم جۆرەیە:

"پێ دەنێینە ٧٦ هەمین ساڵڕۆژی لەدایکبوونی ڕێبەر ئاپۆ کە شوێنێکی  زۆر گرنگی هەیە لە مێژووی گەلەکەماندا. گەلی کورد ٤ ی نیسان وەک ساڵڕۆژی لەدایکبوونی خۆی دەبینێت، بەم واتایە بە خۆشەویستی و جۆش و سوپاسگوزارییەوە ئەم ڕۆژە پیرۆز دەکات. ئێمە ئەم ڕۆژە واتادارە کە بۆ گەلەکەمان مانای لەدایکبوونێکی نوێیە، لە ڕێبەر ئاپۆ و گەلی کورد و تەواوی گەلان و ژنان و دۆستانمان پیرۆزدەکەین.

بێگومان ٤ ی نیسان بۆ گەلی کورد بووەتە دەسپێکی لەدایکبوونەوەیەکی نوێ. ڕێبەر ئاپۆ بە دەستپێکردنی تێکۆشانی ئازادی، وایکرد گەلی کورد کە ڕووبەڕووی لەناوچوون دەبووەوە، سەرلەنوێ هەستێتەوە و هۆشیار و ڕێکخراو بێت و بۆ ئازادیی خۆی تێبکۆشێت. بەم جۆرە گەلی کورد لە هەموو ڕوویەکەوە سەرلەنوێ خۆی ئافراند. بێگومان بوێریی تێکۆشان و ڕێکخستن بۆ ئازادیی گەلێک کە نکۆڵی لە هەبوون و زمان و ناسنامەی کراوە، وڵاتەکەی پارچەکراوە، بە کۆمەڵکوژی بێدەنگی و مردنی بەسەردا سەپێنراوە، بەرئەنجامی زەحمەتیی مەزن و هەوڵی نائاسایی و خۆشەویستی و گرێدراویی قووڵە بۆ گەل و وڵات و ئازادی. بەرئەنجامی ئیرادەیەکە کە وەک پێویستییەکی ئەم خۆشەویستی و گرێدراوبوونە دەرکەوتووە. گەلی کورد لەبەرئەوەی ئەم ڕاستییە باش دەزانێت، خۆشەویستییەکی مەزن بەرامبەر ڕێبەر ئاپۆ نیشان دەدات. لەدایکبوونی ڕێبەر ئاپۆ وەک لەدایکبوونی خۆی، هەبوونی ڕێبەر ئاپۆ وەک هەبوونی خۆی دەبینێت. ئەم هۆشیاری و هەستە قووڵەوە ٤ ی نیشان بە خۆشەویستی و سوپاسگوزارییەوە پیرۆز دەکات.

ڕێبەر ئاپۆ کە بە دەرکەوتنی خۆی پێشهاتنی مێژوویی ئافراند و خۆشەویستی و دڵسۆزییەکی مەزنی گەلی کوردی بەدەستهێناوە، کەسێتییەکە کە دەبێت لە نزیکەوە لێی تێ بگەین. هەڵوێست و تێکۆشان دژی نادادی، بەلای ڕێبەر ئاپۆوە ئەرکی لەپێشینەیە. مرۆڤ دەتوانێت بڵێت ئەم خاڵە جەوهەری کەسێتی و ژیانی وی ئافراندووە. یەکێک لەو ڕەهەندانەی لە هەموو شتێک زیاتر ئەمە نیشاندەدات، نزیکایەتیی ئەوە بەرامبەر ژنان. ڕێبەر ئاپۆ لەبەرامبەر فشار و نادادییەکان دژی ژنان، تێکۆشانێکی مەزنی کردووە. بینی کە هەموو کۆیلایەتی و ڕەنجخۆری و نادادییەک لەسەر بناغەی ئەو کۆیلایەتییە سەریهەڵداوە کە بەسەر ژناندا سەپێنراوە، وە تێکۆشانی ئازادیی کوردی لەسەر ئازادیی ژنان پێشخست. گرێدراوی و دڵسۆزی و خۆشەویستی ژنان، بەتایبەت ژنانی کورد بۆ ڕێبەر ئاپۆ، لێرەوە دێت. ئەمەش لە خاوەندارێتیکردنی ژنان لە ڕێبەر ئاپۆ و پێشەنگایەتی ژناندا دەردەکەوێت. پیرۆزکردنی ٤ ی نیسان لەلایەن ژنانەوە بەوپەڕی جۆشەوە، پەیوەستە بەو ڕاستییەی کە ٤ ی نیسان گرێدراوە بە لەدایکبوونی ژنی ئازادەوە.

بێگومان بەهایەکی سەرەکی لە کارەکتەری ڕێبەر ئاپۆدا، گەردوونیبوونە. ڕێبەر ئاپۆ هەر لە سەرەتاوە، تێکۆشانی ئازادیی کوردی گرێداوە بە بەها گەردوونییە مرۆڤایەتییەکانەوە و لەسەر بناغەی سۆسیالیزم و خوشک_برایەتیی گەلان ئەم تێکۆشانەی بەرەوپێش برد. بە پارادایمی نەتەوەی دیموکراتیک و مۆدێرنیتەی دیموکراتیکی خۆی، بەشدارییەکی مێژوویی کرد لە تێکۆشانی ئازادیی گەردوونیی مرۆڤایەتی، بەم تێکۆشاانە گەیشتە ئەو ڕەوشەی کە پێشەنگایەتی بکات. لە ئەنجامی ئەمەشدا، پەیوەستبوون بە فیکری ڕێبەر ئاپۆ گەیشتە ئاستێکی گەردوونی و هەڵمەتی ئازادیی جیهانی لەسەر ئەم بناغەیە پێشکەوت و مەزنتر بوو. هێزە هەژموونخواز و هەرێمی و خۆجێیەکانی مۆدێرنیتەی سەرمایەداری و هاوکارەکانیان، هەوڵیاندا بە پیلانگێڕیی نێونەتەوەیی و بەدیلگرتنی ئیمراڵی، دەرکەوتنە مێژووییەکەی ڕێبەر ئاپۆ بوەستێنن، بەڵام بە هیچ کام لەم هەوڵانە نەیانتوانی ڕێگە لەم پێشهاتە مێژووییە بگرن. ڕێبەر ئاپۆ بە پێشخستنی تەرزی بەرخۆدانی بێ‌هاوتا، ئەو خیانەت و ناهەقیییە مێژوویییەی پووچەڵکردەوە کە بەسەریدا سەپێنرابوو. بەم تەرزی بەرخۆدانە دژی دیلگرتن و پیلانگێڕییەکی مەزنی مێژوویی، نەیهێشت گەل و مرۆڤایەتی تووشی شکست بێن، بەپێچەوانەوە وایکرد دەسکەوتی زیاتر بەدەستبهێنن. لەڕێگەی بانگەوازەکەیەوە بۆ ئاشتی و  کۆمەڵگەی دیموکراتیک لە ٢٧ ی شوبات، بەرگێکی نوێی بەخشی بە گەلان و مرۆڤایەتی و دیسانەوە ئەم ڕاستییەی پشتڕاست کردەوە.

دیسانەوە ئەم ڕۆژە واتادارە پیرۆز دەکەین و بانگەواز لە ژنان و گەنجان و گەلان و دۆستەکانمان و بەتایبەت گەلی کورد دەکەین، لە هەموو جێیەک ٤ ی نیسان بە چاندنی نەمام پیرۆز بکەن. هەروەها بانگەواز لە گەلەکەمان دەکەین کە ٤ ی نیسان بچنە ئامارا کە زێدی ڕێبەر ئاپۆیە. دەبێت ئەو دیلێتییەی لە کەسێتی ڕێبەر عەبدوڵا ئۆجالاندا بەسەر گەلی کورددا سەپێنراوە، کۆتایی بێت. دەبێت گەلی کورد و دۆستەکانیان، ٤ی نیسان لەسەر بناغەی ئازادیی جەستەیی ڕێبەر عەبدوڵا ئۆجالاندا پیرۆز بکەن، دەبێت لەمەودواش بە ئامانجی ئازادیی جەستەیی ڕێبەر ئاپۆ و بەدیهێنانی هەلومەرجی ژیان و کارکردنی ئازادی ڕێبەر ئاپۆ، تێکۆشان بکرێت. ئازادیی ڕێبەر ئاپۆ، ئازادیی گەلەکەمان و تەواوی گەلان و ژنانە".