هێزەکا ئاسایشو دلینەی ئەرەیاوناشا کە ئۆپەراسیۆنو کەمپو هۆڵی دمایش ئامان. جە ئۆپەراسیۆنەکەنە ٢٠ چەتێ داعشی و هامکارەکێشا باڵبەسێ کریێنێ. هەرپاسە جە کەمپەکەنە دەس سەرو چەک و تەقەمەنیێ فرەیرە گیریان.
فەرماندەیی گرڏی هێزەکا ئاسایشو دلینەی دەربارەو ئۆپەراسیۆنەکەی ئەرەیاونێوە نوویسریاش وەڵاکەردۆ.
ئەرەیاوناکەینە ئاماژە پانەیە کریان، ئۆپەراسیۆنەکە جەلایەنو هێزەکا ئاسایشو دلینەی و هێزەکا ئاسایشو دلینەو _ژەنێ و بە هامکاری یەکینەکا پارێزناو ژەنێ (یەپەژە) یو هێزەکا سوریاو دیموکراتیکو (قەسەدە) ی دلێ کەمپەکەینە ئەنجامدریان و ئارۆ دمایش ئاما. جە ١٨و نیسانینە دەسش پنەکەرد و ٦ ڕوێ بەردەوام بێ.
جە ئەرەیاوناکەینە ئاماژە پانەیە کریان ئامانجو ئۆپەراسیۆنەکەی هورشێونایۆ شانە پەنهانەکێ و پتەوکەردەو ئاسایشو دلینەی و چبەرو کەمپەکەی بێ.
دەربارەو ئەنجامەکا ئۆپەراسیۆنەکەی ئی زانیاریێ وەڵاکریێوە: "٢٠ ئەندامێ داعشی و هامکارەکێشا باڵبەسکەردێ.
یەرێ کڵاشینکۆفێ و دەمانچێوە و تەقەمەنی و کەرەسەی سەروازی کە دلێ خێمەکێنە شاریێبێنێوە، دەسش سەەرە گیریا.
هەوڵێوە بڕەمای بە جەمە، بە هەماهەنگی شانێوە دلێ کەمپەکەی و شانێوە تەرو چبەرو کەمپەکەی، پووچەڵکریاوە و گرڏ ئەنداما تەرێ شانەکەی باڵبەسێ کریێ.
هەرپاسە ئۆپەراسیۆنێوە تایبەتو هێزەکا ئاسایشو دلینەو-ژەنێ شانێوە داعشیش کەرد ئامانج کە چنی شانێوە تەری ڕێکێ گنێنێ پەی ئەنجامدای کردەوەی تیرۆریستی.
ئی ئۆپەراسیۆنە سەرکۆتەو هێزەکاما پەشڕاس کەرۆوە جە دایوەنە و گورزێ تازێ جە دژو شانە تیرۆریستییەکا کە هەوڵ مڏانە ڕەوشو مرۆیی دلێ کەمپەکەینە قۆزناوە پەی جابەجێ کەردەو پلانە تیرۆریستییەکا. هەرپاسە جەخت سەرو پابەندبییەی تەمامی مکەرۆوە پەی ئێزتەیۆ تیرۆریستا و وشککەردەو سەرچەمەکەیشا جە حەر یاگێنە بۆنە".
جە ئەرەیاوناکەینە بانگەواز جە گلێرگەو مییاننەتەوەیی مکەرۆوە وەرپرسیارێتی گێرانە ئەسۆ پەیوەس بە کەمپو هۆلی و هەرمانەی جدییە بکەرا پەی گێڵایۆ گیریایا دلێ کەمپەکەی پەی وڵاتەکاشا.
هەرپاسە جەخت مکەرۆوە، هیچ یاگێوە سڵامەت پەی تیرۆریستا نمازاوە. بانگەواز جە گەلی مکەرۆ هامکاری زیاتەرو هێزەکاشا بکەرا و جە گرڏ جموجوڵێ و چالاکییێ گوماناویی هێزەکاشا ئاگادارێ کریاوە.
