ڕائید فەهمی سکرتێری حزبی شیوعی لە عێراق سەبارەت بە داگیرکارییەکانی دەوڵەتی تورک لە لێدوانێکدا بە رۆژنیوزی راگەیاندووە، دەستدرێژییەکانی دەوڵەتی تورک لە ناوچەکانی هەرێمی کوردستان پێشێلکارییەکی دڕندانەیە.

ئاماژەی بەوەشکرد، دەوڵەتی تورک و هەندێک لە وڵاتانی دیکەی دراوسێ تا دێت شەڕانگێزییەکانیان بەرامبەر عێراق زیاد دەکەن و پێشێلی سەروەری عێراق بە ئاشکرا دەکەن.

باسی لەوەشکرد، سوپای داگیرکەری تورک دەستیکردووە بە بڵاوبوونەوە و درووستکردنی بنکەی نوێ لە خاکەکەماندا و دەبێت حکومەتی عێراق هەڵوێستى هەبێت و کۆتایی بە هەموو دەستدرێژییەکانى ئەو وڵاتە بهێنێت.

جێگاى ئاماژەیە، ماوەی دوو هەفتەیە، دەوڵەتی داگیركەری تورك هەزاران سەرباز و سەدان تانكی هێناوەتە سنووری پارێزگای دهۆك و هێرش و داگیركارییەكانی بۆ سەر هاوڵاتییانی مەدەنی و گوندشینان زیاتر كردووە، دانیشتووانی ئەو سنوورانە بەهۆی بۆردوومانەكانی دەولەتی تورکەوە ناچاربوون گوندەكانیان چۆڵ بكەن.

هـ. ب